المراية الأولى:-
امريكا اللاتينية.... تلك القارة التي قد لا تختلف كثيرا عن قارتنا السمراء... تقريبا نفس الأجواء المناخية...نفس التضاريس... نفس الفقر و الاستعمار و المعاناة البشرية....لكن ليس نفس الإنتاج البشري.... هم يملكون الثورة...و نحن نملك الخمول...هم يملكون جيفارا و دماءه التي تجري في عروقهم و نحن فقدنا ناصر....هم يملكون الحرية و نحن نملك النفاق....هم يملكون ماركيز...
اتفقت معاكم في مرايه اني هقعد اهرتل و اكتب من الشرق والغرب... وكان أفضل ليا اسميها مجلة مش مرايه بس اهو اللي حصل... انا حابب اكلمكم شوية عن ماركيز...مين هو و نظامه ايه و كده... الكلام مالي النت عنه بس انا حابب اتكلم شويه عن ادب الراجل ده...
الكولومبي جابرييل جارسيا ماركيز اتولد سنة تمانيه وعشرين....في قرية صغيره اسمها ارا كاتاكا....اتجوز مارسيدس و اللي بيهديلها كل كتاب في اول كل روايه اهداء صغير ليها كده... اساسا فكرة ان مراته اسمها مرسيدس فكرتني بالكونت دي مونت كريستو و حبيبته مرسيدس... والتشابه واضح بين الحماس والحيويه بين مار
كيز الواقع و مونت كريستو الخيال....عاش فقير جدا و عانى كتير مع مارسيدس...بس النجاح دايما ليه يوم و بيتحقق فبلاش يأس....
بدايته بسيطه جدا.... مراسل صحفي لجرنال كولومبي اسمه اسبكتادورel espectador .... و من ثم بدأ يكتب مقالات و قصص قصيرة و بدأ يتنشرله حاجات...سافر بعيدها عشان يعيش في فرنسا و عاش في باريس و بعدين روما و برشلونه و نيويورك...لف يعني ومنها كانت الخبره الكبيره اللي اتمتع بيها....
اول عمل أدبي ماركيزي كان اسمه:- بحار السفينة المحطمة و كان قصة واقعية عن مركب كولومبية و غرقت...كتبها في صورة قصص مسلسلة...
لكن أول رواية فعلية لماركيز كانت اسمها غرباء الموز.... محققتش نجاح كبير و يقال أنها مطبعتش غير الف نسخه و راحت عليها...محققتش مردود كويس...
أشهر رواية عملها و بقى اسم ماكريز لامع في الأفق كانت ميت عام من العزلةone hundred years of solitude....مكانتش مجرد رواية ده كان كتاب حقق مبيعات تقدر بعشرة ملايين نسخة في عام 1967.... ومن يومها واسم قرية ماكوندو و الي تعتبر بطلة الرواية على كل لسان...
اشتهر أدبه بالواقعية السحرية.... وللاسم ده معنى... والمعنى مقسوم عالكلمتين...الواقعية لأنه كان كل قصصه مستمده من الواقع و في كلام شخصي ليه هو قال ماركيز:- "لايوجد في كتبي أي سطر لايستند الى حدث واقعي".... اما السحرية...لأن النقاد وجدوا في الخيال
الجميل اللي بيقدمه ماركيز نوع من السحر الشائق و انك لما تمسك روايته لازم تتابعها من اولها لآخرها....
كمان ماركيز كتب قصة حياة المناضل الاشتراكي الرائع سيمون دو بوليفار- اللي ياهم بقوة في تحرير امريكا اللاتينية من قيود الاستعمار- في رواية جميلة اسمها الجنرال في متاهة.... أرجو عدم الخلط بين الاخ المناضل سيمون دي بوليفار و الأخت الأديبة الفرنسية الكبيرة سيمون دي بوفوار صاحبة رائعة وداعا سارتر....
ماركيز مصر ان رواياته ممتحولش لأفلام و إن كان اتنازل عن إصراره ده في أغلب رواياته إلا إنه متمسك بيه جدا مع ميت عام من العزله...و بيبرر ده بإنه عاوز الناس تتخيل الشخصيات و الأحداث زي ماهي مكتوبه و زي ماهم عاوزين يتخيلوها مش زي ما المخرج و المنتج و الأبطال عاوزين.... و كان دايما بيقول: "افضل ان يستمر الناس على تصور الشخصيات كما هم،وفي يوم تصبح فيه هذه النقود ضرورية لحركة الثورة في امريكا اللاتينية ساقبل هذا العقد"...
أشهر أعمال ماركيز:-
-ميت عام من العزلة...
1967
-خريف البطريرك...1975
-أحداث موت معلن...1981...و هي الأقرب إلى قلبه...
-الحب في زمن الكوليرا...1985
يعيش الآن ماركيز في منفاه الاختياري بباريس لاعتراضه عالأوضاع المتردية في أمريكا اللاتينية...
نسيت اقولكم انه خد جايزة نوبل سنة 1982 تقديرا على مجموع اعماله و رواياته...
نصيحة...أدب ماركيز أدب بالفعل يستحق القراية... معرفش بس قرايتها مترجمة للعربي بيضعف روح القصه و انفعالاتها ده إن مكانش بيقتلها قتل... ب
س مش هقلوكم اقروا بالأسباني يعني...ما هو أصله مكنش بيكتب إنجليزي راخر...
تبقى كلمة أخيرة:- جابرييل جارسيا ماركيز....سحر الواقع... وواقع السحر...
************
المراية التانية:-
أعتذر اليوم عن كتابة حاجه كمان و هكتفي بماركيز و هدخل على طول على فقرة
كلمات أعجبتني:-
**إذا لم يكن المال خادمك صار سيدك....فولتير
**لنافذة التي يخرج منها الهواء الفاسد هي نفس النافذة التي تسمح بدخول الهواء الصالح....نابوليون
**البلاغة إن تجيب فلا تبطئ وان تصيب فلا تخطئ....لقمان الحكيم
**عجبت لمن يغسل وجهه عدة مرات في النهار ولا يغسل قلبه....باين كده مصطفى كامل..مش فاكر الحقيقة...
**ويل لأمة عاقلها أبكم، وقويها أعمى....تولوستوي
**خير الدروب ما أدى بسالكه إلى حيث يقصد....ميخائيل نعيمة
**الحقيقة دائماً تؤلم من تعوّد على الأوهام....واحد اسمه بيدل
**سقوط الإنسان ليس فشلاً، ولكن الفشل أن يبقى حيث سقط....شخص ما
**************
أنا خلصت و المرة دي ماليش كلمة أخيرة اقولها غير كل سنه و انتم طيبين يا جماعة والحمد لله أني فاضي عشان اكتب و اقولكم عيد سعيد عليكم يا رب... خروجا عن نص المدونات االكتير اللي كتبت تهنئة بالعيد في بوست قلت أنزل البوست ده و في الاخر انزل تهنئه وخلاص...و لا إيه؟...
كل سنه وانتم طيبين....سلااااااااام
رامي سعيد
