يوم ما ابتديت تدوين مكنتش متصور اني هكمل اكتر من شهر واحد و بعدين هكبر دماغي... للعلم انا ابتديت تدوين من زمان قبل المدونات دي...قبل البروفايل ده مالأساس...من ابريل 2007...مدونه كده كانت ساخره..اتريقت فيها عالدراسه و عالحب و عالواقع... بس كان عندي مشكله...محبتش انشرها لسبب بسيط جدا....انا ممكن استحمل ان حد يقول عليا مش موهوب و معرفش اكتب او اني كاتب هاوي...لكن مقدرش استحمل ان حد يقول عليا سخيف و دمي تقيل...عشان كده احتفظت بكتاباتي لنفسي و معرفتش حد بالمدونه بتاعتي....في قله قليله جدا من اصحابي قروا الدرافت بتاع الحاجات اللي اتكتبت و ضحكوا عليها بجد...بس برده مجاليش الجرأة اني انشر المدونه عالملأ....دونت حوالي تلات اربع تشهر وبعدين قفلتها...طبعا مجابتش تعليق واحد يوحد ربنا....و كتابه من غير قراء كالمسرح بدون جمهور و كلاهما كالحروف بلا نقط....فتوقفت
رجعت تاني اكتب....مريت بتجربه خلتني اكتب كتابه رومانسيه...مكنتش بكتب ابدا في اللون ده...بس كتبت...اول حاجه نزلت في مجله في الكليه و حققت مردود كويس...استمريت...مستواي في الموضوع ارتفع...بقالي جمهور...قررت البقاء...فكرت في التدوين...قلت وليه مرجعش...المره دي مش تريقه ولا ساخر و ممكن الناس تقول مش موهوب بس ارحم من انهم يقولوا اني خنيق و دمي تقيل...ابتديت تدوين...و كانت ((حينما تكلمت...قلت)) فاتحة خير عليا....ابتديت اعبر عن كلام جوايا في صورة أدب رومانسي...عجب الناس....و كتبت و كتبت...بس زهقت...قلت ارجع للدرب القديم بتاعي اللي هو اقدم كمان من الساخر...
اعترف اني في الساخر مكنتش كويس....عادي اوي في احسن مني كتييييييييييييير....بس افتكرت ميلي لكتابة القصة....اتعلمت كتابة القصة او الرواية من اخويا كريم-صيدلي-..كريم ملوش اهتمامات اوي بالأدب بس اكتشفت انه بيكتب قصص كويس اوي....تشويق و غموض و شغل بس توقف و مكملش لأسباب قهرية...أبويا اكتشف انه بيكتب قصص...و لما شاف روايته الطويله الأولى في درج المكتب قطعها عصافير الجنه...كريم شاف مشروعه بيتهد ادام عينيه...راح معتزل الكتابه تماما...
اتجهت انا للقصه القصيره و كانت مدونتي المفضلة و الاكثر شهره ليا و هي ((قصاصة ورق))...الأفضل اسما و موضوعا بالنسبه لي...اعتقدت انني حققت نجاحا لا بأس به أبدا و البعض مشكورا يعتبرني موهوبا و البعض بالغ -و له جزيل الشكر-بقوله اني محترف حقيقي و مشروع اديب كويس....بوجه للناس دي كلها كل الشكر و اقولهم اني بحبهم بجد بس انا و الله شايف نفسي في درجه اقل من درجات الهواة...مش تواضع اد ما هو يقين...
طولت عليكو .... بس المدونه الجديده دي..مرايه...هي انطلاقتي الثالثة في عالم التدوين....قليل يعرف اني هقلل جدا جدا من كتابتي في المدونه الاولى.... وهعتمد على نشر القديم و الجيد من الموضوعات.... بس مرايه هتبقى فعلا مرايه....مرايه للواقع و للدراسه و للرومانسيه و للدين و للعجايب و للرياضه و للادب و للسينما و ممكن لو حدث عام مهم -بس مش اوي- يعني...مالاخر تعبير عن رايي و عن مواقف ممكن تكون مهمه.... قد تروا الفكره مكرره و ممله...لكني اعدكم بانه ان شاء الله لن يكون هناك اي ملل...و لو اعجبتكم بفضل الله مدونتاي الاولتين -ضايع في اللغه- فبأذن الله تعالى ستعجبكم دي... و دعواتكم لنا بالتوفيق... ان شاء الله هحاول جاهدا اني متاخرش في الكتابة بس للأسف مش بأيدي....
اسف عالأطاله...و أشكركم على المتابعه
احبكم في الله
اخوكم..رامي سعيد...برنس فور ايفر
هناك 5 تعليقات:
السلام عليكم::
ايه يا برنس..دة انت تاريخ قديم بقى..
شكلها كدة ضربت في دماغي وهعمل مجموعة مدونات..تشكيلة بقى..رومانسي على ساسي على رعب..
مبروك يا باشا المدونة الجديدة..
وشكرا ليك على كلامك الجميل وتعليقك على موضوعي الأخير..
انا مختش بالي الصراحة انك ليك مدونة تانية غير حينما تكلمت قلت إلا منك..
مستني أول مواضيعك..
جو أون (go on)
وابقى شيل تأكيد الكلمة..
صديقى الامير رامى
ابتديت اعبر عن كلام جوايا
وهذا ما اتينا جميعا من اجله الى هنا
وما دام من القلب فتأكد بأنه سيصل الى القلب مباشرة
تحياتى دوما
مممممم
أنا قلت إنت هجرت المدونات بتاعتي و لا إيه ؟؟
و لا زعلت ؟! من حاجه قررت مش هتعلق عند حد !!
جيت لقيتك مبهدل الدنيا .. ينفع كده يعني ؟؟
كل شويه مدونه ؟!
ماشي هتابعك برضو إحنا لينا كام رامي يعني :)
هههههههه
علي بركة الله ياللا ورينا إبداعاتك يا برنس:)
والنبى بذمتك ودينك ده ينفع؟
تعمل بلوج جديد وماتقوليش؟!!!!!!!!
طب يرضيك اكون انا رابع حد يقول مبروك؟
انا مش راضياها لكرامتك
انما قولى
عامل ايه لوقت واخبارك ودراستك؟
يارب تكن بخير
الف مبروك مرايتك الجديده ويارب مش تكتب فيها الا كل اللى يفرح قلبك
دمت بكل خير
طيب يالمض
ثبتنى ثبتنى
اما اشوف اخرتها معاك
صباح الفل يادوك
إرسال تعليق