الهوليجانز و أشياء أخرى

المرايه الاولى:-هل انت من مشجعي كرة القدم؟!!... احنا في مصر يا أهلي يا زمالك و قلة إسماعيلي و جمهور الأقاليم بيشجع دون انتماء حقيقي.... لكن لو تابعت كرة القدم بره هتلاقي بجد الأمر مختلف....بره هنا المقصود بيها أنجلترا... هناك مجانين كوره...بس التعصب بتاعهم مش زي التعصب بتاعنا الراقي المحترم.... هناك يوجد الهوليجانزholigans
بدأ في أنجلترا و بعدين تشعب و بقى في كل دول الكوره.... المتعصب أوي اصطلح عليه اسم هوليجانز.... بس طبعا الأصل أنجليزي لا غبار عليه....
لكن من هم الهوليجانز؟!!
اتفق دايما ان كل فريق ليه رابطة تشجيع....ده عادي....لكن أنه يكون ليه عصابه بتشجعه..فده مش عادي... ده هو حال الهوليجانز... تطور الأمر معاهم ليفوق حدود تشجيع كرة القدم إلى آفاق الجريمة الواضحه دون تحفظ..... صراع دامي يحدث بين جماعات الهوليجانز المنتمية لأندية مختلفه قد ينتهي بمصرع البعض.... بدأ الهوليجانز كرابطة تشجيع عادية جدا.... لكن العصبيه الكرويه بلغت مداها و صار الأمر أشبه بالحرب المستعرة بين تلك الجماعات و تحول التشجيع إلى قتال دامي.... يطلقون على تلك العصابات اسم شركات و هي شركات لا تبغي للربح لكنها تسعى إلى الشهرة..
أقدم الهوليجانز كان هوليجانز فريق ليفربول.... كانوا الأقوى في عصر ما لكن ضعفت شوكتهم بعد أن شاهدوا مصرع قرابة الثلاثين فردا منهم في حادثه نهائي كأس الأندية أبطال الدوري ((دوري أبطال اوروبا حاليا أو الشامبيونز ليج)) عام 1985 في ستاد هيسل في بروكسل حاليا- الملك بودوين- سابقا في المباراة التي جمعت فريقهم مع البطل الأيطالي اليوفنتوس و التي انتهت بفوز الأخير بهدف نظيف...عنف الهوليجانز الخاسر أدى إلى تحطم و انهيار أجزاء من الاستاد مما أدى إلى الكارثة....و منذ ذلك الوقت سقط تنظيم الهوليجانز الليفربولي...
قل اهتمام مشجعي الفرق الإنجليزية الكبرى صاحبة البطولات و الألقاب بتكوين رابطات الهوليجانز و اقتصر الأمر على الفرق الضعيفة من فرق وسط الجدول و فرق القاع... ويعد هوليجانز ويست هام هم الأقوى حاليا..
عموما ضعفت شوكة الهوليجانز تماما بعد حادثة ملعب ويمبلي الشهيرة...
الصورة لمجموعة من الهوليجانز في إحدى المشاجرات...
تبقى كلمة أخيرة: الهوليجانز قوم يعكسون أعتى آيات الشجاعة و الإقدام و الجنون و الحمق...
**************************
المرايه التانيه:- تخبط تام تتعرض له كلية الطب بتاعتنا.... هو مش تخبط أد ما هم محتارين ازاي يرضوا أصحاب السعادة.... اليوم صار الطلبة يتحكموا في النظام الدراسي في الكلية طبقا لأهوائهم الشخصيه.... و اللي حصل في محاضرة التعارف مهزلة بكل المقاييس... كل واحد بقى بيقول النظام اللي هو عاوز انه يتطبق و النظام اللي يمشي على هواه....مكنش ناقص غير اننا نطلب المحاضرات في السرير و الله... قد تكون تلك مهزلة...لكن الكارثة أن الكلية غيرت نظامها بالفعل رغم أن الدكاترة مش راضيين عن النظام الجديد لأ و بيشتكولنا منه.... لدرجة أن السيد الأستاذ رئيس القسم كان واقف معايا و يقولي و الله محتارين مش عارفين نظبطها بس كله عشان خاطركم....عايزين نعلمكم صح بس انتو اللي مش عايزين تتعلموا... بيقولي محتارين نعملكم ايه...طب مش انتو اللي عملتوه...يقولك مش انتو اللي طلبتوا... الموضوع بقى بزرميط و ما على الغلابه اللي زينا إلا التنفيذ...خرجنا منها سلام يا رب...
الكاريكتير نقلا عن منتديات العهد و دمه تقيل اه بس معبر جدا عن الحدوته...
تبقى كلمة أخيرة: لن تتطور أمة يحكمها سفهاء و لن تتطور أمة شعبها أكثر سفها....
*************************
المرايه التالته:-
كلمات اعجبتني:-
**الحب هو الداء الوحيد الذي لا يتمنى المرء أن يشفى منه..... الأديب الأمريكي أرنست هيمنجواي...
**الدبلوماسي رجل يصمت بأكثر من لغة.... الزعيم الراحل أنور السادات...
**اغتيال للحق و الثورة....جيفارا تعقيبا على اغتيال الزعيم الكونغولي بياتريس لومومبا...
**الحق كالزيت يطفو دائما....الأحنف بن القيس...
**يقدر الإنسان نفسه حسب الاعمال التي يعتقد انه يستطيع إنجازها ولكن العالم يقدره حسب الاعمال التي ينجزها في الواقع ....لونجفلو...
**الحياة اقصر من إن نقضيها في تسجيل الأخطاء التي رتكبها غيرنا في حقنا وفي تغذية روح العداء بين الناس....برتراند راسل...
**لم يكتشف الطغاة بعد سلاسلاً تكبل العقول......لورد توماس...
** إعمل الخير لأصدقائك يزيدوك محبة، واعمل الخير لأعدائك ليصبحوا أصدقاء....تولوستوي...
************************
أخيرا....لي حكمتان مفضلتان...
الاولي عامة :- لو نظر كل فرد في المرآه....ما كره في الدنيا سواه...... والمقصود بيها أننا نكتشف عيوبنا الشخصيه اللي عمرنا ما بنبصلها و قاعدين بس نفلي في عيوب غيرنا و نتفنن في تحليلها..
التانيه خاصه ببتوع طب و غيرهم من اللي بيمتحنوا شفوي:- حاسة المعلم تغلب دوما حاسة الممتحن... فاستغل ذلك...
طبعا واضحه...يعني يوم ما الدكتور يزنقك ارجع انت لاقرب سؤال جاوبته و قله طب الحته دي بنعملها ازاي...طب بنشوف فيها ايه..هو هيتلهي و يقعد يشرحلك فيها..تكون انت فكرت في الاجابه او يكون هو نسي السؤال اصلا... بس كده...مع مراعاة ان فيه دكاتره ولاد ... مبيقعوش في الكلام ده...طبعا ده راجع لخبرتك في قراية الشخص اللي قاعد ادامك...
أخيرا أخيرا...دي اول مراية بعكسلكم بيها شويه حاجات سريعه كده.... أرجو أن تكون قد اعجبتكم و اللي عنده اي نقد للأسلوب ده ياريت يبلغني ولكم جزيل الشكر....
اخوكم في الله...رامي
أخيرا اوي بئه....انا بعاني مع البلوجر ده و بقالي ساعه انشر و اعيد و انشر و في الاخر فشلت اني اظبط شكل المدونه المعووج ده... و الكلام اللي رايح شمال ده... النبي اللي عنده حل يقولهولي